Starfsgrundvöllur leikskóla
Starfsemi leikskóla á Íslandi byggir á lögum um leikskóla nr.78/1994 og aðalnámskrá leikskóla sem er lögfest námskrá sem tók gildi 1. júlí 1999.  Aðalnámskrá leikskóla er fagleg stefnumörkun um uppeldismál, þar er markmiðum leikskólastarfs lýst og leiðum að settum markmiðum.

Eftirfarandi meginmarkmið eru sett fram í lögum um leikskóla nr.78/1994.
· Veita börnum umönnun, búa þeim hollt uppeldisumhverfi og örugg leikskilyrði.
· Gefa börnum kost á að taka þátt í leik og starfi og njóta fjölbreyttra uppeldiskosta barnahópsins undir leiðsögn leikskólakennara.
· Kappkosta í samvinnu við heimilin að efla alhliða þroska barna í samræmi við eðli og þarfir hvers og eins og leitast við að hlúa að þeim andlega og líkamlega svo þau fái notið bernsku sinnar.
· Stuðla að umburðarlyndi og víðsýni barna og jafna uppeldisaðstöðu þeirra í hvívetna.
· Efla kristilegt siðgæði barna og leggja grundvöll að því að börnin verði sjálfstæðir, hugsandi, virkir og ábyrgir þátttakendur í lýðræðisþjóðfélagi sem er í örri og sífelldri þróun.
· Rækta tjáningar- og sköpunarmátt barna í þeim tilgangi að styrkja sjálfsmynd þeirra, öryggi og getu til að leysa mál sín á friðsamlegan hátt.

Þrjú lykilatriði í uppeldisstefnu Hjallatúns.
Að efla tilfinningagreind barna.
Við leggjum sérstaka áherslu á að efla tilfinningagreind barna. Við leitumst við að gefa hverju einstöku barni tíma, hlusta á þau og ræða um líðan þeirra ásamt því að leggja sérstaka áherslu á nærveru, umhyggju og hlýju í leikskólastarfinu.
Einstaklingum með góða tilfinningargreind líður betur og geta stjórnað tilfinningum sínum í stað þess að láta tilfinningarnar stjórna sér.  

Að kenna börnunum lýðræði, efla frumkvæði þeirra og styrkja sjálfsmynd.
Við teljum að börn eigi rétt á að taka þátt í ákvörðunum sem varða þeirra eigið líf.  Með því að taka þátt í  ákvörðunum lærir barnið lýðræði. Á Hjallatúni getur barnið að miklu leyti skipulagt leik sinn sjálft og á þann hátt haft mikil áhrif á daglegt líf sitt í leikskólanum. Með þessu lærir barnið að taka sjálfstæðar ákvarðanir sem vekur hjá því frumkvæði, ánægju og gleði og styrkir sjálfsmynd þess.

Að nota leikinn sem helstu náms og þroskaleið barnins.
Leikurinn er miklilvægasta náms- og þroskaleið leikskólabarnsins og í honum felst mikið sjálfsnám. Þegar börn leika sér eru þau að þroska með sér margvíslega hæfileika.  Barn sem er að leika sér í hlutverkaleik ( mömmuleik ) er til dæmis að æfa sig í samskiptum  og efla félagsleg tengsl og barn sem er í fjörugum Tarzan leik í sal er að styrkja bein og vöðva.
Kannanir sem gerðar hafa verið meðal barna sýna, að börn telja sig fá of lítinn tíma og ekki nægan frið til leikja. Á Hjallatúni hlúum við vel að leiknum og forðumst allt óþarfa skipulag sem annars myndi trufla leikinn.